જીએલએસની શતાબ્દી ઉજવણીમાં ‘રૂટ્સ ઓફ ટુમોરો’ અંતર્ગત વૃક્ષારોપણ
1
0
અમદાવાદ: ગુજરાત લો સોસાયટી (જીએલએસ)ની શતાબ્દી વર્ષની ઉજવણી અંતર્ગત જીએલએસ યુનિવર્સિટી દ્વારા એલિસબ્રિજ સ્થિત કેમ્પસમાં ‘રૂટ્સ ઓફ ટુમોરો’ વૃક્ષારોપણ કાર્યક્રમનું આયોજન કરવામાં આવ્યું હતું. શતાબ્દી ઉજવણીના આ પાંચમા કાર્યક્રમમાં પર્યાવરણ સંરક્ષણ, સામાજિક જવાબદારી અને આવનારી પેઢી માટે હરિયાલા ભવિષ્ય નિર્માણનો સંદેશ આપવામાં આવ્યો હતો.
આ પ્રસંગે અમદાવાદ મ્યુનિસિપલ કોર્પોરેશન (AMC)ના કમિશનર શ્રી બંછાનિધિ પાની મુખ્ય મહેમાન તરીકે ઉપસ્થિત રહ્યા હતા. જાણીતા પત્રકાર શ્રી અજય ઉમટ પણ હાજર રહ્યા હતા. તેમણે પર્યાવરણનું જતન માત્ર એક વ્યક્તિ કે સંસ્થાની નહીં, પરંતુ સમગ્ર સમાજની સામૂહિક જવાબદારી હોવાનું જણાવતાં શિક્ષણ સંસ્થાઓની ભૂમિકા મહત્વપૂર્ણ ગણાવી હતી.
જીએલએસ યુનિવર્સિટીના પ્રમુખ શ્રી સુધીર નાણાવટીના નેતૃત્વમાં યોજાયેલા આ કાર્યક્રમમાં મહાનુભાવોએ વૃક્ષારોપણ કરી પર્યાવરણ સંરક્ષણનો સંદેશ આપ્યો હતો. વિદ્યાર્થીઓ અને શિક્ષકો સાથેના સંવાદ દરમિયાન શ્રી નાણાવટીએ વધુમાં વધુ વૃક્ષો વાવવા તેમજ વાવેલા છોડને ઉછેરવાની જવાબદારી નિભાવવાની અપીલ કરી હતી. તેમણે જણાવ્યું હતું કે, “આજે વાવેલું દરેક વૃક્ષ આવતીકાલની પેઢી માટે સ્વચ્છ હવા, સુરક્ષિત પર્યાવરણ અને આશાનું પ્રતીક છે.”
કાર્યક્રમમાં જીએલએસ યુનિવર્સિટીના એક્ઝિક્યુટિવ ડિરેક્ટર ડૉ. ચાંદની કાપડિયા, યુનિવર્સિટીના અધિકારીઓ, વિવિધ સંસ્થાઓના વડાઓ, શિક્ષકો, કર્મચારીઓ અને મોટી સંખ્યામાં વિદ્યાર્થીઓ ઉપસ્થિત રહ્યા હતા. સૌએ ઉત્સાહપૂર્વક વૃક્ષારોપણમાં ભાગ લઈ પર્યાવરણ પ્રત્યેની પોતાની પ્રતિબદ્ધતા વ્યક્ત કરી હતી.
પોતાના સંબોધનમાં શ્રી અજય ઉમટે જણાવ્યું હતું કે, “પર્યાવરણનું રક્ષણ માત્ર સરકારની જવાબદારી નથી, પરંતુ દરેક નાગરિકની ફરજ છે.” તેમણે યુવાનોને કુદરતી સંસાધનોના જતન માટે સક્રિય ભૂમિકા ભજવવા અને સમાજમાં જાગૃતિ ફેલાવવા પ્રેરણા આપી હતી.
કાર્યક્રમનું મુખ્ય આકર્ષણ મહાનુભાવો દ્વારા કરવામાં આવેલ વૃક્ષારોપણ રહ્યું હતું. વૃક્ષારોપણ માત્ર એક પ્રવૃત્તિ નહીં, પરંતુ વિકાસ, આશા અને પર્યાવરણ પ્રત્યેની લાંબા ગાળાની પ્રતિબદ્ધતાનું પ્રતીક બન્યું હતું. વિદ્યાર્થીઓ અને શિક્ષકોએ પણ વાવેલા છોડની સંભાળ રાખવાનો સંકલ્પ લીધો હતો.
જીએલએસની શતાબ્દી ઉજવણી અંતર્ગત યોજાયેલ આ કાર્યક્રમ દ્વારા સંસ્થાએ સ્પષ્ટ સંદેશ આપ્યો હતો કે શિક્ષણ માત્ર જ્ઞાન પૂરતું સીમિત નથી, પરંતુ સમાજ અને પર્યાવરણ પ્રત્યેની જવાબદારી નિભાવવાનું પણ મહત્વનું છે. આ પહેલ દ્વારા વિદ્યાર્થીઓમાં જવાબદાર નેતૃત્વ, ટકાઉ વિકાસ અને સમાજસેવાની ભાવનાને વધુ મજબૂત બનાવવાનો પ્રયાસ કરવામાં આવ્યો હતો.
કાર્યક્રમના અંતે તમામ ઉપસ્થિતોએ પર્યાવરણનું જતન કરવા, વધુમાં વધુ વૃક્ષો વાવવા અને હરિયાળા ભવિષ્યના નિર્માણ માટે સતત પ્રયત્નશીલ રહેવાની પ્રતિજ્ઞા લીધી હતી. ‘રૂટ્સ ઓફ ટુમોરો’ કાર્યક્રમ જીએલએસની શતાબ્દી ઉજવણીનો એક મહત્વપૂર્ણ પડાવ બન્યો હતો, જે સંસ્થાની પર્યાવરણ અને સમાજ પ્રત્યેની પ્રતિબદ્ધતાને દર્શાવે છે.
